Pangur Bán Testo

Pangur Bán (The Scholar and his Cat) Messe ocus Pangur Bán, cechtar nathar fria saindan: bíth a menmasam fri seilgg, mu memna céin im saincheirdd. Caraimse fos ferr cach clu oc mu lebran, leir ingnu; ni foirmtech frimm Pangur Bán: caraid cesin a maccdán. O ru biam scél cen scís innar tegdais, ar n-oendís, taithiunn, dichrichide clius, ni fris tarddam ar n-áthius. Gnáth, huaraib, ar gressaib gal glenaid luch inna línsam; os mé, du-fuit im lín chéin dliged ndoraid cu ndronchéill. Fuachaidsem fri frega fál a rosc, a nglése comlán; fuachimm chein fri fegi fis mu rosc reil, cesu imdis. Faelidsem cu ndene dul hi nglen luch inna gerchrub; hi tucu cheist ndoraid ndil os me chene am faelid. Cia beimmi a-min nach ré ni derban cách a chele: maith la cechtar nár a dán; subaigthius a óenurán. He fesin as choimsid dáu in muid du-ngni cach oenláu; du thabairt doraid du glé for mu mud cein am messe.