S'istrada ‘e Sa Luna Testo

In s'istrada 'e sa Luna

bi fiat una cria

ocros 'e castanza.

In s'istrada 'e sa Luna

unu raju luchiat
in sinnu de isperatzia,

sinnu de fortuna.

E che rore de iberru

ermosa sa luche

chi juchiat sa pache

in chelos de ferru.



In sa gherra 'e sas gherras

bi fiat unu pitzinnu

sos pilos nigheddos.
In sa gherra 'e sas gherras

cantaiat un'innu

a sos malefadados,

a sas noas terras.

E che bentu, che frore

fiat bellu su risu,

fiat mannu su sole

chi juchiat in coro.

Bi fiat unu pitzinnu

sos pilos nigheddos,

ocros ispantados

e in bucca unu cantu.



In coro 'e sos soldatos

bi fiat una cantone,

l'aiat posta Deus.

In coro 'e sos soldatos

non b'aiat rejone

a inbentare s'anneu

frutt'' e dolores mudos.

E che frina de mare

galana sa die,

galana ses tue,

columba 'e abrile.

In coro 'e sos soldatos

galana sa die,

galana ses tue,

columba 'e beranu.



Bi fiant duos pitzinnos

intr'e custu sonniu,

intr'e custu contu,

fiant bellos che annijos.

In s'istrada 'e Fortuna

bi fiant duos pitzinnos,

isperas juchiant

a sa Luna.



In s'istrada 'e sa luna,

bi fiat una cria

ocros 'e castanzas.